Leygardagin 25. og sunnudagin 26. juli verður Tórshamar Open aftur hildin á breytini hjá Byrsumúla. Kappast verður bæði í OL-trap og í OL-skeet. Skotin verða 3 umfør (75 dúgvur) leygardag og 2 umfør (50 dúgvur) + finalur sunnudag.

Um luttakaratalið loyvir tí, verða nýggju 8-mans finalurnar skotnar í Meistarabólkunum í báðum greinum. Alt eftir luttakaratali verða finalur eisini í A-bólkum.

Kappingarnar telja við í ymsu kappingunum og úttøkunum hjá Skjótisambandinum. Aftaná kappingarlok leygardagin eru allir skjúttar vælkomnir til ábit, har okkurt gott er lagt á grillina, eins og vanligt hevur verið til hesa kappingina. Byrjað verður at skjóta kl. 9 leygarmorgun og kl. 13 sunnudag. Allir skjúttar skulu møta í seinasta ein hálvan tíma frammanundan. Aftaná kappingarlok báðar dagarnar fara allir luttakarar at rudda breytina fyri dúgvubrot. Um ein ikki hevur stundir at vera við til ruddingina, hevur ein heldur ikki stundir at skjóta.

Kostnaðurin fyri kappingina er 800 kr., tó soleiðis at unglingar (undir 21 ár) rinda 100 kr. Serlig heiðursmerki eru gjørd til kappingina, eins og góðir vinningar verða latnir. Lutakast verður um eitt gávukort frá Atlantsflog á 2.500 kr. millum allar skjúttar, sum hava luttikið í kappingini, umframt at aðrir góðir vinningar eisini eru at vinna.

Tilmelding fer fram við at senda ein teldupost til byrsumuli@gmail.com í seinasta lagi mikukvøldið 22. juli, kl. 20, við upplýsing um navn, felag ein umboðar, og hvørt ein luttekur í skeet ella trap. Luttøkugjaldið kann rindast kontant leygarmorgunin ella verða flutt á konto 9181 – 515.875.5 í seinasta lagi hósdagin.

Í sambandi við, at vegirnir rundanum skjótibreytina eru stongdir fyri ferðslu, nú Tórshavn Maraton er, verður breytin ikki opin fyri almennari skjóting hendan sunnudagin.

Opið verður aftur hósdagin 11. juni, kl. 17.

Nevndin

15. Simme Cup kappingin verður skotin leygardagin 16. mai. Byrjað verður kl. 9 og til ber at fylgja við úrslitunum í kappingini her:

https://docs.google.com/spreadsheets/d/1YrpRQqNiUZW2XFOFVl45rUS25KqramsQTpu-IvzAivs/edit?usp=sharing

Leygardagin 16. mai verður 15. Simme Cup kappingin hildin á skjótibreytini hjá Veiðifelagnum Byrsumúla.

Kappingin er í OL-skeet og OL-trap, og skotin verða fýra umfør (100 dúgvur). Fyrstu trý umførini telja m.a. við í Føroya Cup í OL-trap og OL-skeet í 2026.

Meistarafinalurnar verða skotnar við ISSF finalum í báðum greinum; 6 skjúttar í trap og 8 skjúttar í skeet. Endaplássini frá nr. 1-6 telja við í Grand Prix kappingini fyri trap og skeet í 2026.

Eftir finalurnar verður sjálv Simme Cup kappingin, har tríggir teir bestu skjúttarnir í ávikavist skeet og trap frá fyrstu fýra umførunum skjóta eftir 25 dúgvum í part. Stendur á jøvnum í hesum umfarinum, verður vinnarin funnin við at telja aftureftir í innleiðandi kappinginin.

Ongin morgunmatur verður, men okkurt verður til matna á middegi.

Byrja verður at skjóta klokkan 09:00, og møtt verður í seinasta lagi kl. 08:30.

Eftir kappingina verður ábit fyri allar luttakarar og fyri limir úr øllum skjótifeløgum í Føroyum.

Prísur fyri kapping: 450 kr., tó rinda unglingar (upp til 21 ár) 100 kr.

Prísur fyri ábit: 150 kr.

Seinasta freist at boða frá luttøku til kappingina í ávikavist OL-trap ella Skeet og/ella til ábit er mikukvøldið, 13. mai, kl. 20 við telduposti til byrsumuli@gmail.com. Í tilmeldingini skal upplýsast navn á luttakara, felag, kappingargrein, og hvørt ein ynskir at luttaka til ábit.

Áðrenn heiðursmerkjahandanina verður farið at rudda breytina.

Breytin er opin hósdagin, Kristi himmalaferðardag kl. 13-17 fyri venjing hjá teimum, sum hava meldað til kappingina.

Úrslitini frá kappingunum í ávikavist OL-trap og OL-skeet kunnu síggjast her:

https://docs.google.com/spreadsheets/d/1FNCDprD6rA9GpRCAMWAT4QQCRQ_4umT8CgBi00WySzc/edit?usp=sharing

Samlaðu úrslitini frá samlaðu F80-kappingini, sum er 3 umfør í egnari kappingargrein og 1 umfar í øvugtari grein, kunnu síggjast her:

https://docs.google.com/spreadsheets/d/1Jin-XsdQfiuoRrChPkmoEruGkH6HyeYX0cjrJFwzvJ8/edit?usp=sharing

Breytin er opin til venjing hósdagin, 26. mars kl. 17-19 hjá teimum, sum hava meldað til luttøku í F80-kappingini leygardagin.

Nevndin

Leygardagin 28. mars 2026 verður føðingardagskappingin hjá Byrsumúla á breytini í Sandvíkum. Skotin verða antin 3 umfør OL-skeet + 1 umfar OL-trap ella 3 umfør OL-trap + 1 umfar OL-skeet.

Tann, sum tilsamans hevur rakt flest dúgvur í hesum 4 umførunum, vinnur kappingina. Stendur á jøvnum verður talt aftureftir, fyrst umfør og síðan dúgvur.

Felagið er stovnað í 1980, haðani navnið á kappingini F80, og verður Byrsumúli sostatt 46 ár í ár. Umframt at vera ein kapping, har allir luttakararnir skjóta móti øllum tvørturum kappingargrein, er talan eisini um eina sjálvstøðuga kapping í ávikavist skeet og trap. Aftaná fyrstu trý umførini í egnari grein, verða skotnar meistarafinalur í skeet og trap, áðrenn farið verður til 4. umfar í felagskappingini.

Í OL-trap fara 6 teir fremstu skjúttarnir at skjóta eina 2022-finalu (upp til 50 dúgvur), og í OL-skeet fara 8 teir fremstu skjúttarnir í eina nýggja 2025-finalu (upp til 36 dúgvur). Hesar skeet-finalurnar eru ikki royndar í Føroyum fyrr.

Byrja verður at skjóta klokkan 09:00, og møtt verður í seinasta lagi kl. 08:30.

Luttøkugjaldið, ið er 350,00 kr. (unglingar undir 21 ár rinda 100,00 kr.) verður goldið innan kappingarbyrjan.

Tilmelding fer fram við at senda ein teldupost til byrsumuli@gmail.com við upplýsingum um navn, møguligt limafelag, og kappingargrein, sum man ynskir at skjóta 3 umfør í (skeet ella trap).

Tilmeldingarfreistin er mikukvøldið 25. mars kl. 20:00.

Leygardagin 14. februar verður Múlameistarakappingin hildin á skjótibreytini hjá Veiðifelagnum Byrsumúla.

Kappingin er aftur í ár skipað sum ein felags kapping, har tað hesuferð verður skotið eitt umfar OL-skeet, eitt umfar OL-trap og eitt umfar Doubletrap á 30 dúgvur. Skjúttin, ið hevur rakt flest dúgvur av 80, hevur vunnið. Um tað stendur á jøvnum millum vinnarar, verður kappingin avgjørd við shoot-off á Doubletrap.

Byrja verður at skjóta klokkan 10:00, og møtt verður í seinasta lagi kl. 9:30.

Tilmelding til kappingina fer fram við at senda ein teldupost til byrsumuli@gmail.com Tilmeldingarfreistin er hóskvøldið 12. februar, kl. 20:00.

Kappingin er innanhýsis limakapping fyri allar limir hjá Veiðifelagnum Byrsumúla, og kappingin er ókeypis fyri limir, ið hava goldið limagjaldið fyri 2026. Annars kostar hon 250,00 kr.

Starvsnevndin

Árligi aðalfundurin hjá felagnum, verður leygardagin 14. februar 2026, kl. 16:00, í felagshølinum á Sandvíkum. Skráin er sambært lógum felagsins.

Ynskjast mál á skrá til “innkomin mál”, skal frágreiðing sendast felagnum á teldupost byrsumuli@gmail.com í seinasta lagi leygardagin 7. februar 2026.

Eftir fundin bjóðar felagið ábit við onkrum góðum afturvið, og av tí at vit skulu keypa inn, hevði verið gott, um teir limir, ið ætla sær at luttaka á aðalfundinum, boða frá luttøku við at senda ein teldupost til byrsumuli@gmail.com

Vinarliga
Starvsnevndin

Leygardagin 25. oktobur 2025 verður seinasta kappingin í ár hildin á skjótibreytini hjá Veiðifelagnum Byrsumúla á Sandvíkum.

Kappingin verður skipað sum ein veiði- og sporting kapping. Programmið verður avdúkað leygarmorgunin, tá kappingin byrjar.

Skotin verða tvey innleiðandi umfør og síðani eitt finalu umfar.

Byrjað verður at skjóta kl. 9:30, og møtt verður í seinasta lagi kl. 09:00, tá ymsu skotplássini verða avdúkað.

Luttøkugjaldið er 350 kr., tó 100 kr. fyri unglingar undir 21 ár, og skal hetta rindast innan kappingina.

Av tí at nøkur av standplássunum eru á grasi, verður viðmælt at lata seg í fótbúna til endamálið.

Til harukappingina verður loyvt at brúka hálvautomatiskar og pumpgun byrsur.

Tilmelding fer fram við at senda ein teldupost til byrsumuli@gmail.com

Tilmeldingarfreistin er hóskvøldið 23. oktobur kl. 20:00.

Veiðifelagið Byrsumúli