Tað eydnaðist í dag at avgreiða føðingardagskappingina hjá Byrsumúla á nýggju breytini, hóast hendan ikki er liðug og ikki tikin alment í nýtslu enn. Kappast varð í skeet og OL-trap, og heili 28 luttakarar vóru við úr Byrsumúla, Sunda Byrsufelag, Eysturskot og Vestmanna Byrsufelag. Kappingin gekk væl, og ongin ivi er um, at breytin verður góð, tá hon er liðug og vallað.

Úrslitið gjørdist, at Marius Joensen (SBF) vann suverent við 88 dúgvum (av 100), Alex Johannesen (EYS) gjørdist nr. 2 við 76 dúgvum og Sámal Debes (SBF) nr. 3 somuleiðis við 76 dúgvum. Úrslitini hjá okkara skjúttum vóru merkt av, at vit ikki hava havt nakra breyt at skjóta á síðan á jóansøku í fjør, og at øll orkan í ár er farin til arbeiðið at gera nýggju breytina klára.

Í kappingini í dag skeyt Alex Johannesen fyrsta 25-talið (allar dúgvurnar) á nýggju OL-trap breytini, meðan Marius Joensen skeyt heili trý 23-tøl á Skeet breytini. Hjartaliga til lukku við hesum.

Breytin verður fyribils ikki alment opin, men vónað verður, at hendan er liðug og klár at taka alment í nýtslu til Simme-Cup kappingina, sum verður 21. mai í ár.

Nevndin

Kappingin er skipað soleiðis, at skjúttar velja at skjóta 3 umfør av OL-trap og 1 umfar av Skeet ella øvut. Á hendan hátt kappast báðar greinarnar móti hvørji aðrari. Fyrstu trý umførini eru í egnari skjótigrein og fjórða umfari er í hinari greinini. Stendur á jøvnum verður talt aftureftir, fyrst umfar fyri umfar og síðan dúgvur í einstaka umfarinum. Aftaná kappingina verður farið at rudda breytina, innan heiðursmerki og steyp verða handað.

Kappingarleisturin og úrslitini síggjast á hesari leinkjuni:

https://docs.google.com/spreadsheets/d/1zTMt09oo5GwfcD4vyS0JtBttY4-hsU7IkoSkwrJbwBg/edit?usp=sharing

Nú F80-kappingin stendur fyri durum, verður breytin opin fyri skjúttum, sum hava meldað seg til kappingina. Venjing er hósdagin 24. mars, kl. 17-19.

Freistin at melda seg til kappingina var í kvøld, mikukvøldið 23. mars, kl. 20, og tá høvdu 28 skjúttar boðað frá luttøku.

Nevndin

Leygardagin 26. mars 2022 verður F80 kappingin hjá Byrsumúla á nýggju breytini í Sandvíkum. Breytin er ikki heilt liðug enn, men klárt verður tó at avgreiða kappingina, sum ætlað.

Skotið verður antin 3 umfør skeet + 1 umfar OL-trap, ella 3 umfør OL-trap + 1 umfar skeet.

Tann, sum tilsamans hevur rakt flest dúgvur í hesum 4 umførunum, vinnur kappingina.

Byrja verður at skjóta klokkan 09:00, og møtt verður í seinasta lagi kl. 08:30.

Luttøkugjald: 150,00 kr. (íroknað kapping og dúgvur).

Skjúttar kunnu nýta egnar patrónir, sum lúka treytirnar frá SKF, ella keypa patrónir á breytini.

Tilmelding fer fram við at senda ein teldupost til byrsumuli@gmail.com við upplýsingum um navn, møguligt limafelag, og kappingargrein, sum man ynskir at skjóta 3 umfør í (skeet ella trap)

Tilmeldingarfreistin er mikukvøldið 23. mars kl. 20:00